قصيدة سامحني واقبل عذري مكتوبة كاملة
كلمات لطمية سامحني باسم الكربلائي
سامحني واقبل عذري
مجبوره أمضي الگبري
وحدك أعوفك ياحيدر وحدك أعوفك
افراگك يعشرة عمري
أصعب علي من كسري
وحدك أعوفك ياحيدر وحدك أعوفك
حيرني وضعك ماريد اودعك
علي يالما كفو غيرك إلي ابهالكون
مثل زيجتنه لا كان او أبد ميكون
أمر مكتوب من گبل القلم والنون
علي وي فاطمه ابفد منزل اينزلون
محمد والدي ظل يعتبرنه اعيون
ليش الگوم رادوا للنبي يعمون
البيعه انكثوا بغيابه او ماحتى جف اترابه
ابحقك أداعي ياحيدر ابحقك أداعي
عاليدعون اصحابه درعك صرت بمصابه
ابحقك أداعي ياحيدر ابحقك أداعي
يالمهري درعك ماريد اودعك
كل واحد يأدي ياعلي دوره
وانا الأديت دوري ابأكمل الصوره
لجل عيناك عيني الحمره مسطوره
او لجل جبر الولايه اضلوعي مكسوره
ما أطلب جزا واتگلي مشكوره
الطلب تعذرني لو عالفرگه مجبوره
تدري يحلو الملگه محد يريد الفرگه
يصعب وداعك ياحيدر يصعب وداعك
أحچي ابدليلي الحرگه وابعبرتي مختنگه
يصعب وداعك ياحيدر يصعب وداعك
يالوافي طبعك ماريد اودعك
أنا كلشي إلك وانته إلي كلشي
فخر يكفيني گلبك ياعلي عرشي
قسم باللي انطعن صدره ابرمح وحشي
رمح فرگاك صعبلي غمض رمشي
الموت الموت اريده او ينحمل نعشي
لچن ماريد عنك أرحل او أمشي
متحيرات اجروحي اتفيض او تعرج روحي
لو أبقى يمك ياحيدر لو أبقى يمك
يالتصغي صمتي او بوحي ترخصني يخمد نوحي
لو أبقى يمك ياحيدر لو أبقى يمك
آمر واسمعك ماريد اودعك
أنا اللي ابكل حروبك من چنت ترجع
أضمدك ياحبيبي او أذرف المدمع
غميجه اجروحك او چانت دمه تنبع
او تكابر عالألم جدامي يالأنزع
لچن هاليوم اشوفك وانته تتوجع
مو هينه أعوفك وامضي للمضجع
بانت عليك الامك من جدمك الحد هامك
تبچي اعله حالي ياحيدر تبچي اعله حالي
منهو اليجر اسهامك وانته ابأشد أيامك
تبچي اعله حالي ياحيدر تبچي اعله حالي
يالتجري دمعك ماريد اودعك
على احساسك أخافن مو على احساسي
لهذا امن احتضر ماريدك اتقاسي
خل نفرض وسط حجرك تحط راسي
او بين ايديك ألفظ آخر انفاسي
هالصوره تظل تذكرها ماناسي
يعز اعليه حالك يا أعز ناسي
يا بالحسن خليني وحدي او أغمض عيني
رحمه ابشعورك ياحيدر رحمه ابشعورك
اولا تمسح اعله اجبيني او يمك أمد ايديني
رحمه ابشعورك ياحيدر رحمه ابشعورك
ذكرى او تصدعك ماريد اودعك
المحب ال وي حبيبه ايعيش كل دنياه
ابساعة موته ميريده ايتأذه اوياه
يجيني الموت إنا ياعلي لله
او على امصلايتي أترقبه او أرجاه
تفيض الروح من صدري ابزفير الآه
او تجي امن المسجد او بس الجسد تلگاه
أختم سور قرآني او أتشهد ابأحزاني
ما بيه مهجه ياحيدر ما بيه مهجه
ميته ابقهر تلگاني واشما تهز جثماني
ما بيه مهجه ياحيدر ما بيه مهجه
والدمعه شرعك ماريد اودعك
أموتن واجده اعله افلان ويه افلان
ابسببهم أنحرم منك يبو الوجدان
علي ابموتي يعظم أجرك الرحمن
او تعزيك الملايك والإنس والجان
سياف الحرايب چنت بالميدان
او دفان الحبايب صرت بالأحزان
الباري ابجلالة ذاته أوحالك ابآياته
صبرا جميلا ياحيدر صبرا جميلا
جفنك جرت عبراته غص گلبك ابآهاته
صبرا جميلا ياحيدر صبرا جميلا
موتي يفجعك ماريد اودعك
وحگك ياللي حگك ياعلي اتسلب
گبل بابي ابغديرك أشتكي للرب
أدري ابموتي ثارك داخلك يلهب
ألا تبت إدين اللي دفعني او تب
يمن صبرك غده من كل حرب أصعب
التزامك بالوصيه ابهالأمر أوجب
لو ما صبرت اعليهم چان اشيسوي بيهم
حد ذوالفقارك ياحيدر حد ذوالفقارك
لا رگبه يترك ليهم او لجهنم ايوديهم
حد ذوالفقارك ياحيدر حد ذوالفقارك
اوصيه او تمنعك ماريد اودعك